O Presidente da SGXX, O Reitor da UDC E a Conselleira de Traballo inauguran o XXV Congreso Internacional da SGXX

 In Actividades e Congresos

O Presidente da SGXX e Director do GIG da UDC, a conselleira de Traballo e Benestar, Beatriz Mato, e o reitor da Universidade da Coruña, Xosé Luís Armesto, presidirán o venres, 10 de maio, ás 12.00 horas, a inauguración do XXV Congreso Internacional da Sociedade Galega de Xerontoloxía e Xeriatría, que terá lugar no Salón de Actos do Edificio Universitario de Oza. Este encontro, que se desenvolverá ao longo do venres 10 e o sábado 11 de maio, está organizado pola Sociedade Galega de Xerontoloxía e Xeriatría, presidida polo Catedrático de Xerontoloxía Clínica e Social e director do Grupo de Investigación en Xerontoloxía da UDC José Millán Calenti, que preside tamén o Comité Organizador. Na organización colabora tamén a Facultade de Ciencias da Saúde e conta co patrocinio de diferentes entidades.

A Sociedade Galega de Xerontoloxía e Xeriatría aglutina a case 400 socios e leva 25 anos de traxectoria tratando de sensibilizar á sociedade sobre a importancia de coñecer o fenómeno do envellecemento, tanto desde o punto de vista sociodemográfico como da consecución dunha boa saúde. O eixo central desta edición do congreso, para a que se elixiu a cidade da Coruña, será a investigación, desenvolvemento e innovación en xerontoloxía e xeriatría. Os obxectivos do programa científico son dar a coñecer as principais liñas e proxectos de investigación en relación co envellecemento desenvolvidos en Galicia, así como os principais consorcios de ámbito internacional establecidos. Tamén se pretende poñer en valor a I+D+i como elemento fundamental no crecemento socio-económico e outorgarlle unha perspectiva internacional ao encontro.

Programa
O programa científico do congreso contará con relatorios e sesións simultáneas, entre as que destaca a conferencia plenaria que ofrecerá ás 10.00 horas no salón de actos a catedrática de Fisioloxía da Universidade Complutense de Madrid Mónica de la Fuente. O relatorio, titulado Avances e perspectiva de futuro na investigación do envellecemento, será presentado polo catedrático de Enfermaría Xeriátrica da Universidade de Santiago de Compostela José Manuel Mayán Santos.

A continuación, a partir das 10.45 horas, desenvolveranse as comunicacións orais clínicas e as presentacións póster, que se celebrarán simultáneamente no salón de actos e na aula magna. Tras o acto oficial de inauguración, ás 12.00 horas, celebrarase no salón de actos unha mesa redonda sobre I+D+i na rede hospitalaria galega: calidade de vida e envellecemento, moderada por Raimundo Mateos, profesor de Psiquiatría da USC e responsable da Unidade de Psicoxeriatría do Complexo Hospitalario Universitario de Santiago. Participarán nesta sesión Carlos Rodríguez Pascual, xefe do servizo de Xeriatría do Complexo Hospitalario Universitario de Vigo; Fernando Veiga, xefe do servizo de Xeriatría do Hospital Universitario Lucus Augusti (Lugo); José Castillo, director científico do Instituto de Investigación Sanitaria do CHUS, e Francisco Blanco, director da Plataforma Proteómica do Instituto de Investigación Biomédica do Complexo Hospitalario Universitario da Coruña.

A xornada de mañá concluirá cun obradoiro sobre selección e validez de instrumentos de avaliación cognitiva en persoas maiores, e pola tarde, a partir das 16.00 horas, celebrarase unha mesa redonda sobre I+D+i en universidades: liñas de traballo en xerontoloxía e xeriatría. A sesión estará moderada por Mª Dolores Monteagudo González, profesora de Anátomo-Fisioloxía e coordinadora científica do Posgrao en Xerontoloxía da Universidade Fernando Pessoa (Portugal). Participarán como relatores Fernando Díaz Fernández, director do Grupo de Investigación en Neurociencia Cognitiva da USC; José Mª. Cancela Carral, director do Grupo de Investigación HealthyFit e profesor da Universidade de Vigo; Stella António, docente do Instituto Superior de Ciencias Sociais e Políticas da Universidade Técnica de Lisboa, e Ana Maseda Rodríguez, do Grupo de Investigación en Xerontoloxía da Universidade da Coruña.

A continuación celebraranse novos obradoiros, presentacións póster e unha conferencia plenaria a cargo do relator Božidar Voljč, director de Xerontoloxía Médica-Instituto Anton Trstenjak (Eslovenia), e vicepresidente da Área de Saúde da Plataforma Europea de Envellecemento (AGE Platform) en Bruxelas. O relatorio, que será presentado por Ana Maseda, do Grupo de Investigación en Xerontoloxía da UDC, levará por título Quality of life of old people: a European perspective.

Nas xornadas de tarde, tras as comunicacións orais clínicas, celebrarase a partir das 18.45 horas unha nova mesa redonda sobre I+D+i e entidades presentadoras de servizos sociocomunitarios, moderada polo profesor da USC Manuel Gandoy. Participarán Javier López, director xeral da Fundación Barrié; José Javier Yanguas, director de Polo Innovación-Envejecimiento, do Instituto Gerontológico Matía (Donosti), e José Manuel Pazos Seco, subdirector xeral técnico de Geriatros.

Xa na xornada do sábado, 11 de maio, tras as comunicacións orais celebraranse diversas mesas redondas paralelas ao longo de toda a mañá nas que se tratarán temas como as novas tecnoloxías e servizos en xerontoloxía e xeriatría, servizos sociais para a promoción da autonomía persoal e a atención a persoas en situación de dependencia, manexo dos síndromes xeriátricos en atención primaria, así como epidemioloxía e factores de risco vinculados ao envellecemento. Entre os relatores figura o profesor José C. Millán Calenti, que presentará os resultados do seu proxecto de investigación denominado Telexerontoloxía.

Finalmente, ás 13.15 horas terá lugar a conferencia de clausura, a cargo de Javier Cudeiro, catedrático de Fisioloxía da UDC, que falará sobre Envellecemento: caídas e reeducación funcional. O relatorio será presentado polo médico de Atención Primaria da Estrada Mario López Martínez. Ás 13.45 horas celebrarase o acto de clausura e entrega de premios. A organización establece un premio de 600 euros e dous accésits con diploma acreditativo para cada unha das modalidades de presentación de comunicación (oral social e oral clínica). No caso dos pósteres o premio será de 400 euros e dous accésits con diploma acreditativo.

Recent Posts
Contact Us

We're not around right now. But you can send us an email and we'll get back to you, asap.

Start typing and press Enter to search